Økonomiregelverket

Regelverket for økonomistyring i staten skal sikre ei effektiv styring og utnytting av statlege midlar og ei god mål- og resultatoppnåing. Kravet om å formulere mål og rapportere om oppnådde resultat er nedfelt i løyvingsreglementet § 9. Krav til effektiv ressursbruk er nedfelt i § 10 i reglementet.

Regelverket for økonomistyring i staten (økonomiregelverket) har som formål å sikre

a) at statlege midlar blir brukte og inntekter oppnådde i samsvar med Stortingets vedtak og føresetnader
b) at fastsette mål og resultatkrav blir oppnådde
c) at statlege midlar blir brukte effektivt
d) at statens materielle verdiar blir forvalta på ein forsvarleg måte 

 

Verkeområdet for økonomiregelverket:

• Aktivitetar i statlege forvaltingsorgan (verksemder)
• Styring og oppfølging av statlege forvaltingsorgan og andre som har fått delegert forvaltingsmyndigheit
• Forvaltinga av statlege tilskots-, stønads- og garantiordningar
• Styring og oppfølging av statlege eigarinteresser i selskap
  

Økonomiregelverket har fleire nivå:

Reglement for økonomistyring i staten utgjer det øvste nivået i regelverket og blir fastsett ved kongeleg resolusjon. Reglementet avgrensar seg til hovudprinsipp for økonomistyringa med mellom anna grunnleggjande styringsprinsipp. I reglementet er det gitt heimelsgrunnlag for Finansdepartementet til å fastsetje utdjupande føresegner.

Føresegner om økonomistyring i staten utgjer neste nivå og blir fastsett av Finansdepartementet med heimel etter § 3 i reglementet. Føresegnene supplerer reglementet og omhandlar i meir detalj føresegner på ei rekkje område, mellom anna departementa si styring av verksemder, verksemders interne styring og felles standardar og system for mellom anna rekneskapsrapportering, bokføring og betalingsformidling. Det er òg gitt nærmare føresegner knytte til forvalting av tilskotsordningar, stønadsordningar til privatpersonar og forvalting av garantiordningar.

I rundskriv til forvaltninga kjem Finansdepartementet med presiseringar og utdjupande føresegner knytte til løyvingsreglementet og reglement for økonomistyring i staten. Finansdepartementet sender òg ut rundskriv i tilknyting til dei årlege budsjett- og rekneskapsprosessane.

Finansdepartementet har som budsjettdepartement eit overordna ansvar for økonomistyring i statsforvaltinga. Departementet fastset prinsipp og standardar for god økonomistyring gjennom føresegnene i økonomiregelverket.

Finansdepartementet har delegert til Senter for statleg økonomistyring myndigheita til å forvalte økonomiregelverket. Det gjeld med unntak av føresegnene om departementa si styring av underliggjande verksemder (etatsstyringa), som Finansdepartementet varetek.

Regelverksforvaltinga til SSØ

Arbeidet til SSØ med å forvalte økonomiregelverket omfattar i hovudsak fortolking av regelverket, behandling av unntakssøknader, utarbeiding av rettleiarar og metodedokument i tillegg til gjennomføring av seminar og kurs for statlege verksemder.

Fortolking av regelverket og behandling av unntakssøknader

SSØ får ei rekkje spørsmål om forståing og fortolking av regelverket for økonomistyring i staten. Vi behandlar òg søknader frå departementa om unntak frå regelverket for økonomistyring. Dersom du har spørsmål eller ønskjer å søkje om unntak, sjå kontaktinformasjon.

Rettleiarar og metodedokument

Finansdepartementet og SSØ har gitt ut fleire rettleiarar knytte til økonomiregelverket. Du finn dei her.

Kurs, seminar og rådgiving

SSØ-kursa er opne for alle tilsette i statlege verksemder. På kurs om regelverk går ein gjennom økonomiregelverket med ei oversikt over føresegner om etatsstyring, den interne styringa og utforminga til verksemdene og tilskotsforvaltinga. Alle kurs og seminar er omtalte i kurskatalogen til SSØ, og påmelding skjer via heimesida vår. 

Sjå kursoversikt og påmelding her.