Om SSØ

Senter for statleg økonomistyring (SSØ) har som oppgåve å styrkje den statlege økonomistyringa og forbetre ressursutnyttinga på området.

SSØ blei etablert 1. januar 2004, som ein av sju etatar under Finansdepartementet. Etableringa skjedde hovudsakleg gjennom samordning av ressursar innanfor finansavdelinga i Finansdepartementet, i økonomitenesteseksjonen i Skattedirektoratet og ved 18 skattefutkontor.

SSØ har i dag om lag 360 tilsette fordelt på seks regionkontor og éi sentraleining i Oslo. Regionkontora ligg i Hamar, Drammen, Kristiansand, Stavanger, Trondheim og Tromsø. I tillegg er det ei avdeling i Vadsø som ligg under regionkontoret i Tromsø.

SSØ er statens ekspertorgan innanfor statleg styring og utfører forvaltingsoppgåver for alle statlege verksemder. I tillegg leverer SSØ økonomitenester til om lag 70 prosent av dei statlege verksemdene.

Visjon og verdiar

Visjonen vår er ”effektiv ressursbruk i staten”. Verdiane serviceinnstilling, truverde og initiativ skal prege måten vi handlar og opptrer på, både overfor omgivnadene våre og internt.

Verksemdsidé

Som statens ekspertorgan skal SSØ, med utgangspunkt i regelverket for økonomistyring, leggje til rette for god styring i staten. Den unike rolla til SSØ er å vareta behovet staten har for ei heilskapleg tilnærming på området.

 

Forvalting, rådgiving og kompetansetiltak

SSØ har ansvar for å forvalte regelverket om økonomistyring i staten. Vi fortolkar regelverket, gir råd og rettleiing og tilbyr kompetansetiltak innanfor styring:

• mål- og resultatstyring
• intern styring og kontroll
• risikostyring
• budsjettering og rekneskapsføring
• samfunnsøkonomiske analysar og evalueringar
• utforming av statlege tilskotsordningar

SSØ har òg ansvaret for to konsernsystem i staten:

• Statsrekneskapen
• Statens konsernkontoordning

Innanfor statens konsernkontoordning omfattar ansvaret rammeavtalar med bankane om betalingstenester for statlege verksemder og forvalting av verksemdene sine oppgjerskontoar i Noregs Bank.

Lønns- og rekneskapstenester 

SSØ leverer lønns- og rekneskapstenester til statlege verksemder. Bruken av desse tenestene er frivillig for verksemdene. SSØ tilbyr ei solid og moderne lønnsteneste bygd på ei SAP HR-løysing som er tilpassa behovet til statlege verksemder, og vi er eit av dei største SAP-miljøa i landet innanfor drift og utvikling.

Rekneskapstenesta vår er basert på Agresso som systemløysing og er tilpassa krava i gjeldande regelverk for statlege verksemder.

Sentrale dokument

Finansdepratementets tildelingsbrev for SSØ 2010                     

SSØs årsrapport 2009 

 

Brosjyremateriell fra SSØ

	Profilbrosjyre (Bokmål)   Profilbrosjyre (Nynorsk)
	Mål og strategi