Statsrekneskapen

Senter for statleg økonomistyring (SSØ) overtok i mai 2004 oppgåver som tidlegare låg i Finansdepartementet. Her finn du oppdatert informasjon om SSØs ansvar og oppgåver for statsrekneskapen. Overføringa frå Finansdepartementet er nærmare omtalt i brev frå Finansdepartementet av 6.5.2004:

Overføring av funksjonar knytte til konsernsystema i staten (pdf)

Senter for statleg økonomistyring har ansvaret for forvalting og drift av statsrekneskapen. Statlege verksemder har plikt til å sende rekneskapsrapportar til statsrekneskapen etter føresegnene og standardane som er fastsette av Finansdepartementet for budsjettering og rekneskapsføring, omtalte i føresegner om økonomistyring i staten og rundskriv frå Finansdepartementet.

Sjå rundskriv her: 

 Rundskriv frå Finansdepartementet.

Føresegner om økonomistyring i staten (pdf)

Ansvaret til Senter for statleg økonomistyring omfattar mellom anna mottak, behandling og kontroll av rekneskapsrapportane som skal sendast frå statlege verksemder kvar månad, sjå Rekneskapsrapportering.

Fristen for rekneskapsrapportering er den 15. i påfølgjande månad, sjå Fristar for rekneskapsrapportering.

Når statsrekneskapen er avslutta for kvar månad, sender SSØ eit oppdatert løyvingsrekneskap og kapitalrekneskap til departementa på ansvarsområda deira. Rekneskapen skal sendast elektronisk og på papir til dei etablerte kontaktane i departementa. Utover rapportering til departementa blir det utarbeidd rekneskapsoversikter som skal sendast til Finansdepartementet. Riksrevisjonen får òg oppdaterte rekneskapstal ved kvar periode. I tillegg får Statistisk sentralbyrå kvar månad rekneskapstal som blir brukte til å utarbeide statistikk om offentlege finansar.


Finansdepartementet har ansvaret for å utarbeide ei årleg stortingsmelding om statsrekneskapen (st.meld. nr. 3 om statsrekneskapen medrekna folketrygda). Dei overordna krava til innhaldet i denne stortingsmeldinga finst i løyvingsreglementet til Stortinget. Stortingsmeldinga har ein foredragsdel og ein vedleggsdel. Vedleggsdelen inneheld oversikter over statlege utgifter og inntekter (løyvingsrekneskapen), statlege eigedelar og gjeld (kapitalrekneskapen), statleg garantiansvar og andre rekneskap og spesifikasjonar. Stortingsmeldinga blir utarbeidd med grunnlag i rapporteringa av rekneskapstal frå statlege verksemder og fagdepartementa til Senter for statleg økonomistyring. Finansdepartementet utarbeider kvart år eit rundskriv om årsavslutning og fristar for innrapportering til statsrekneskapen.

Bruk av belastingsfullmakter og betalingar mellom statlege verksemder

Vi viser til Finansdepartementets rundskriv R-111 om bruk av belastingsfullmakter og betalingar mellom statlege verksemder, gyldig frå 1. januar 2008.

Statlege verksemder får fullmakter til å disponere løyvingar gjennom tildelingsbrev og belastingsfullmakter. Når eit departement gir dei underordna verksemdene budsjettfullmakter, skal det skje ved tildelingsbrev. Belastingsfullmakter skal brukast når ein ikkje kan gi budsjettfullmakter ved delegering. Det gjeld i alle tilfelle der den verksemda som skal få fullmakter, ikkje er underordna den verksemda som gir fullmakter. Belastingsfullmakt kan ikkje brukast overfor verksemder som har fått unntak frå bruttobudsjetteringsprinsippet.

Den verksemda som har fått belastingsfullmakta, skal rapportere dei bokførte utgiftene til statsrekneskapen.

I staden for å bruke belastingsfullmakt kan ei statleg verksemd velje å overføre beløpet til bankkontoen til den mottakande verksemda. Betalinga skjer på vanleg måte via konsernkontoordninga. Begge verksemder skal rapportere bokførte utgifter og inntekter til statsrekneskapen.

Bruk av underpostar

SSØ har fått spørsmål om bruk av underpostar til post 21, Spesielle driftsutgifter. Ifølgje gjeldande standard for 01-postar blir underpostane 11–19 (–18) brukte til lønn og godtgjersler. Underpostane 21–29 blir brukte til varer og tenester. SSØ tilrår at dei verksemdene som ønskjer det, nyttar seg av den ovannemnde strukturen for å dele inn underpostar under post 21. Det vil harmonere bruken av underpostar og bidra til eit felles standard oppsett for postgruppene 01 og 21. Underpostane 11, 12, 18, 21 og 22 er alt faste underpostar og skal brukast slik det er fastsett i Finansdepartementets rundskriv R-101.